[Agor] Graeculorum fabulae nudae

[David Movrin]

PULCHRITVDO TAM ANTIQVA ET TAM NOVA
De seminario Xo Graecitatis classicae vivae
Selianiticis anno MMoIIo habito

Sanctus Augustinus, ille vir doctissimus atque vitae genus laboriosissimum 
secutus, propter scientiam linguae Atticae minime animum suum ad superbiam 
extollere poterat. Ignorantiam suam turpem immo vero lamentabili voce 
solebat deplorare: "Ego quidem Graecae linguae perparum assecutus sum et 
prope nihil", sic in tractatu suo Contra litteras Petiliani contristatus 
confitetur. "Sero medicina paratur", hodie quispiam philologorum, ira 
contractis superciliis, fortasse dixerit; Augustinum in tempore puerili 
minus dulcia poma aliena furari, plusque linguae terque quaterque beati 
Sophoclis studere oportebat ... Sed qui sine peccato est nostrum, primus in 
illum lapidem mittat! Etsi nobis Graecae linguae tantus habitus est, ut 
libris legendis et intellegendis idonei reperiamur, tamen nihilominus 
impotentes obticescimus, si quando ab amicis interrogamur de Graeca lingua 
loquenda. Lingua nostra sed torpet, tenuis sub artus flamma demanat, sonitu 
suopte tintinant aures geminae, teguntur lumina nocte. Quamobrem nobis 
omnibus non solum fatendum, sed etiam magna voce confitendum est: vivae 
Graecae linguae perparum assecuti sumus et prope nihil.

Quid autem oportet nos facere, a tempore antiquitatis longe longeque 
remotos? Usus magister optimus esse videtur - sed quomodo hodie inveniatur? 
Quis nunc modo Demosthenis Graece loquens nos adibit? Ecce, annuntio vobis 
gaudium magnum: nullam causam desperationis habemus! Letum temporis non 
finit omnem vivam Graecitatem, dulce ridentem dulceque loquentem. Nam 
adiutorium nostrum quotannis in Peloponnesiaca civitate Selianiticorum iuxta 
Patras prope pulcherrimum mare latet. Ibi mense Augusto iam decimum 
seminarium Graecitatis classicae vivae multo successu et bono eventu paratum 
est. Participes circiter quindecim ab omnibus finibus terrae profecti, non 
solum multas civitates Europae sed immo vero aliis continentibus mundi 
relictis in illum locum conveniebamus. Minima natu vix puella gymnasialis, 
maxima iam lanifica et linifica matrona erat; sed ambae semper cum aliis 
causam discutiendam aequo animo susceperunt. Cuncti bis cotidie occursus 
philologiae faciebamus, semel ante, iterum post meridiem, succincti lumbos 
in Graecitate et induti loricam amicitiae et calciati pedes in praeparatione 
textus legendi, in omnibus sumentes scutum glossarii et galeam grammaticae 
et praecipue gladium linguae. Quoniam hic annus iubilaeus quattuor et 
viginti saecula a morte Socratis dilapsa esse designat, lectiones nostrae de 
illo viro sapientissimo factae sunt; in prima septimana facetissimas 
ementiticias epistolas Socratis legebamus, in secunda Alcibiadem maiorem, 
spurium tamen illustrem dialogum Platonis. Tam lectio quam exegesis 
quaestionesque disputationesque lingua Graeca tantum agebantur. Incredibile 
auditu, mirabile visu! Prima septimana in primis magister celeberrimus 
Helmodus Quack, praeceptor Germaniae - vetus capillos, gravis ratione et 
sapientia, iuvenis admodum in corde, lapsus discipulorum semper in risum 
amoenum vertens - nonnullique discipuli peritissimi Graece locuti sunt. 
Altera parte feriarum veniente autem omnes miraculose non solum balbutientes 
breviloquia, sed etiam subtiliter multiloquia, immo vero soliloquia Graeca 
facere potuimus!

Cotidie sicut discipuli praeclari Aristotelis in horto perpulchro immensae 
latitudinis morati sumus, ambulantes, sedentes, iacentes, multi enim saepe 
apparebant nantes in gurgite vasto maris Corinthiaci, sub curru nimium 
propinqui solis. Nam Hellenikon Idyllion, sicut deversorium nostrum 
nominatur, locus aptissimus ad kalokagathian colendam esse videtur; ibi 
quisque recubans sub tegmine fagi patulae silvestrem Musam tenui avena 
meditari potest. Permaxime generosum dominus Andreas Drekis deversorium 
illum possidens sese ostendebat, vir bonus, dicendi peritus, cuius concinna 
natura mixtione iucunda Maecenatis Trimalchionisque optime describi potest. 
Homo autem ille egregius omnibus participibus seminarii lectum atque tectum 
dono dedit. Vespere rerum eventuumque variatio felix est exposita, nunc 
musica, nunc saltatio, nunc cantus varia qualitate animos omnium 
perturbabat. Helmodus, magister noster, duo acroasis ardentiore studio fecit 
imminente luna - alteram de arte poetica Ioannis Ritsi, alteram de Socrate 
et eius dogmate, ambas summa scientia conspicuoque calore dicendi. Nos 
discipuli feriis paene finitis duas commoedias more Aristophanico scripsimus 
Graece, simul et numerum monumentorum Graeciae historicorum grandem augentes 
et nostrarum ineptiarum testes spectatoresque incredibiliter delectantes. 
Sed sapienti sat; omnia ab acia et acu videri possunt in interreti, pagina 
www.idyllion.gr.

Multi, egomet in primis, ut aperte dicam, ita loquebamur: Nisi viderim, non 
credam! Recte enim in incredulitate nostra perseverabamus, nam hic non sunt 
beati, qui non viderunt et crediderunt. Contra vero, venite et videte! Ecce: 
mare lucidum, grex amicissimus Graece loquentium, rapidus progressus 
potentiae linguisticae – iam eas ob causas Peloponnesum visitare res idonea 
esse videtur. Longe maxima enim causarum omnium viva pulchritudo illius 
linguae nos invitat, pulchritudo tam antiqua et tam nova.

David Movrin


_________________________________________________________________
Send and receive Hotmail on your mobile device: http://mobile.msn.com